Ás, dvalar- og hjúkrunarheimili

Dagana 24.-27. júní var hátíðin Blóm í bæ haldin hérna í Hveragerði. Hátíðin leggur áherslu á blómaskreytingar, garðplöntur og í ár var sérstaklega haldið uppá 125 ára afmæli Garðyrkjufélags Íslands. Íbúar Hveragerðis tóku þátt í hátíðinni með því að skreyta hús sín og garða á frumlegan og skemmtilegan hátt með blómum. „Blóm í skó“ var einn liður hátíðarinnar þar sem keppt var um flottustu blómaskreytinguna í stígvélum eða skóm. Starfsfólkið í Ásbyrgi tók þátt og vann verðlaun fyrir frumlegustu skreytinguna. Við þökkum starfsfólki Ásbyrgis fyrir þetta skemmtilega framtak.

Árni Páll Árnason félags- og tryggingamálaráðherra og Guðrún B. Gísladóttir forstjóri Grundar undirrituðu síðastliðinn föstudag samning um rekstur á nýju og glæsilegu 110 rýma hjúkrunarheimili við Suðurlandsbraut 66 í Reykjavík. sem hlotið hefur nafnið Mörk – hjúkrunarheimili.

Árni Páll Árnason, félags- og tryggingamálaráðherra, segir að með opnun Markar sé orðin að veruleika sú stefna sem mörkuð hefur verið til framtíðar um gjörbreyttar og bættar aðstæður aldraðra á hjúkrunarheimilum með áherslu á sjálfstæði og virðingu aldraðra og rétt þeirra til heimilis og einkalífs.