Myndlistarsýning heimiliskonu á Grund

Haustið 1965 kom Sheena Gunnarsson til Íslands til að kenna ensku við málaskólann Mími en Sheena er ættuð frá Hjaltlandseyjum. Hún ætlaði að búa einn vetur á Íslandi en hreifst af landinu, strax á leiðinni frá Keflavík til Reykjavíkur segir hún og áttaði sig á að líklega ætti hún erfitt með að yfirgefa landið aftur. Sheena var sannspá.

Hún kynntist eiginmanni sínum Friðriki Gunnarssyni og þau ólu upp börnin sín fjögur í húsi sem Sheena hannaði og þau byggðu við Sólbraut 18 á Seltjarnarnesi. Friðrik lést 2019.

Sheena nam hönnun og myndlist við Listaháskólann í Edinborg, einnig glerblástur og glerskurð og lauk kennsluréttindum frá Edinborgarháskóla.

Sheena hefur hannað bókakápur, málað postulín, unnið með leir, vefnað, silki og hún kenndi lengi í samfélagshúsinu við Aflagranda.

Í janúar 2015 greindist hún með parkinson sem hefur breytt listsköpun hennar en ekki dregið úr henni. Myndirnar sem verða til sýnis á tengiganginum á fyrstu hæð Grundar eru unnar undanfarin þrú ár með aðstoð frá starfsfólki iðjuþjálfunar.

Verið hjartanlega velkomin með ykkar aðstandendum á sýninguna sem er opin alla daga næstu vikurnar.